Əli bəy Hüseynzadənin əsərlərinin, foto arxivinin və şəxsi əşyalarının təqdimatı

2017-ci il iyunun 09-da Azərbaycan Respublikası Mədəniyyət və Turizm Nazirliyi və Azərbaycan İstiqlal Muzeyinin təşkilatçılığı ilə Muzey Mərkəzinin akt zalında Azərbaycan ədəbi-ictimai fikrinin parlaq nümayəndəsi, görkəmli türkoloq, tanınmış mütəfəkkir və yazıçı-publisist Əli bəy Hüseynzadənin qızı Feyzəvər xanım Alpsar tərəfindən Azərbaycan İstiqlal Muzeyinə hədiyyə olunan sənət əsərləri, foto-sənədli arxiv və şəxsi əşyalardan ibarət sərgi-təqdimat keçirildi.
Azərbaycan dövləti və xalqı Əli bəy Hüseynzadə şəxsiyyətini, onun zəngin irsini yüksək qiymətləndirir. Bu mənada Azərbaycan Respublikasının Prezidenti İlham Əliyev tərəfindən 2014-cü il yanvarın 21-də görkəmli ictimai xadim Əli bəy Hüseynzadənin 150 illik yubileyinin keçirilməsi barədə və cari ilin 16 may tarixində Azərbaycan Xalq Cümhuriyyətinin 100 illik yubileyi haqqında verilən sərəncamları xüsusi qeyd etmək lazımdır.
Təqdimatda İstanbuldan gətirilən 161 əsərdən seçilmiş Əli bəy Hüseynzadənin, övladları Səlim Turan və Feyzəvər Alpsarın yaratdığı bir sıra sənət əsərləri, Əli bəyin həyatının müxtəlif anlarını əks etdirən fotoşəkillər, şəxsi əşyaları nümayiş olunub. Ümumiyyətlə, 37 təsviri sənət əsəri, 48 fotoşəkil, 53 şəxsi əşya, 22 orden, medal və nişanlar, eləcə də ipək üzərində çap olunmuş “Həyat” qəzeti Azərbaycana hədiyyə olunub. Onu da qeyd edək ki, Azərbaycan muzeylərinə ilk dəfə belə dəyərli əşyalardan ibarət kolleksiyanın hədiyyə olunması çox əhəmiyyətli hadisədir.
Tədbirdə sərgi ilə tanışlıqdan sonra Azərbaycan ədibi, filosof, ədəbi tənqidçi, tərcüməçi Əli bəy Hüseynzadənin həyatı, fəaliyyəti və onun qızı – İstanbulda yaşayan Alpsar Feyzəvər xanım tərəfindən göstərilən vətənpərvərlik nümunəsinə həsr edilmiş videogörüntü nümayiş olundu.
Tədbirdə Azərbaycan Respublikası Mədəniyyət və Turizm naziri cənab Əbülfəs Qarayev, Türkiyənin Azərbaycan Respublikasında səfiri Erkan Özoral, Milli Azərbaycan Tarixi Muzeyinin direktoru Nailə Vəlixanlı, Türk Mədəniyyəti və İrsi Fondunun prezidenti Günay Əfəndiyeva, Əli bəy Hüseynzadənin həyat və yaradıcılığının tədqiqatçısı Yavuz Akpınar, əsərlərin Azərbaycana hədiyyə olunmasının təşəbbüskarı Teymur Rzayev, Feyzəvər xanımın ailə dostu İbrahim Yıldırımın çıxışları nəzərdə tutulub. Mütəfəkkir ədibin ailəsi adından tədbirdə Cəmilə Hüseynzadəyə söz veriləcək.
Feyzəvər xanımın xahişi ilə onun nümayəndəsinə Azərbaycan Respublikasının üçrəngli bayrağı cənab nazir tərəfindən təqdim olunacaq.
Tədbir ərzində Türkiyə ilə Feyzavər xanımla canlı bağlantı oldu.
Sonda müğənni, Azərbaycan Respublikasının Xalq artisti Azərinin ifasında “Çırpınırdın, Qara dəniz” (musiqisi Üzeyir Hacıbəyli, sözləri Əhməd Cavad) mahnısı ifa olundu.

IMG_5681copy

IMG_5627copy

IMG_5845copy

IMG_5592copy

Search